Deoc’h da c’houzout - Katalog Malrieu
Follennoù distag

(FV = feuilles volantes e galleg / Follennoù distag)

En tu-hont d’an abegoù hollek a zo kaoz m’eo bet savet ar c’hatalog-mañ, displeget e Katalogoù diaraok, e fell d’al lec’hienn-mañ :

• Hizivaat ar c’hatalog Ollivier. Rak savet eo bet e 1942, ha pezhioù nevez a zo deuet war-wel abaoe. Lod anezhe a oa koshoc’h eget 1942, met ne oant ket anavezet gant J. Ollivier. Re all a zo bet embannet war-lerc’h. Ouzhpenn da se n’en doa dalc’het kont J. Ollivier nemet eus ar c’hanaouennoù e brezhoneg, ha reizh e kavomp lakaat ivez ar c’hanaouennoù e galleg, dreist-holl pa gaver anezhe asambles gant kanaouennoù all e brezhoneg, war ar memes follenn.
  Gant tachenn ar c’hanaouennoù dezhe un tem relijiel e c’haller en c’houlenn hag-eñ e ranker chom gant ar pezhioù a gont un istor, buhez ur sant, hag a zo, gant se, tost d’ar « gwerzioù » (kanaouennoù gant ur perzh istorel pe mojennel), ha laoskel a-gostez ar pezhioù a feiz rik ha n’int ket dedennus-kenañ, ret eo lavaret, a-fed danevelliñ ?
  Tanav-tanav eo an harzoù alies etre an eil rumm hag egile… Dibabet ez eus bet amañ ledanaat un tamm tachenn an enklask. Dre lakaat kriterioù dibab e c’haller termenañ evel ma vez c’hoant an dachenn enklask c’hoantaet.
  Miret en doa J. Ollivier 1154 c’han disheñvel. El lec’hienn, en he stad kentañ, e konter tost da 6000.
  Kemend-all ivez evit embannadurioù disheñvel follenn-mañ-follenn. Alies e anavezer bremañ un hanter muioc’h a adstummoù e-keñver ar pezh a oa e-barzh ar c’hatalog Ollivier.
• Aesaat ar c’havout dielloù : gant ar binvioù nevez e c’haller ober klaskoù war un dra resis dre griterioù, klaskoù war gerioù zo, war kanaouennoù o plediñ gant ar memes tem, hag all. Evit an dra-se n’eo ket gwall aes ober gant ar c’hatalog Ollivier : evit kavout un dra resis e ranker follennata al levr a-bezh (n’eus ket a renkadur dre demoù na gerioù-alc’hwez).
  Gant ar binvioù klask-se eo kalz aesoc’h an traoù ivez d’an neb a fell dezhañ labourat war an danvez « follennoù distag » e-unan (stadegoù…), kaset e vezer war-eeun d’an notennoù war an oberourien, ar voullerien hag all.
• Reiñ an tu d’an anvrezhonegerien da gaout ur soñj eus danvez ar c’hanaouennoù dre reiñ un diverrañ e galleg hag a zispleg en un toullad linennoù peseurt sujedoù zo e-barzh ar c’han.
• Reiñ an tu da welet un eilad d’an diell e stumm PDF, ha kaout evel-se an testennoù a-bezh, forzh pelec’h e vefer. Ha gouzout ivez pelec’h eo bet gwelet an diell orin. Ouzhpenn da se, bezañ barrek da greskiñ an testennoù war e skramm a zo un aezamant a gaver brav alies a-walc’h.
• Lakaat war-wel al liammoù a zo d’ober gant pezhioù aet en hengoun dre gomz, dreist-holl pezhioù ar c’hatalog Malrieu TO. Gant se e c’haller mont da welet e diaz Dastum ha selaou skouerioù eus ar c’han dastumet e hengoun dre gomz eil hanter an XXvet kantved pe penn kentañ ar XXIañ.
• Reiñ d’ar c’hatalog ur perzh emdroüs hag a genlabour. Dre ma n’eo ket dalc’het ken gant ar moullañ war baper e c’hall al lec’hienn bezañ hizivaet ha klokaet ingal gant traoù nevez gavet. Gant spered ar c’henlabour e c’haller degemer meur a ginnig a-bep seurt ha kaout eskemmoù etre ar re a zeu war al lec’hienn hag ar re a ver an dataeg.