Kanouennoù eus Breizh moullet evit ar bobl
Dataeg follennoù distag

Deoc’h da c’houzout - Katalogoù diaraok

Katalog Ollivier

Dre ma veze gwelet ar pezhioù produet-se evel un is-lennegezh, tud desket an XIXvet ha penn kentañ an XXvet, hag ar re droet war ar studioù keltiek, n’o deus ket graet kalz a van oute, an aliesañ, hag-eñ e oant traoù a veze kavet stank-stank d’o c’houlz. Unan bennak dibar a zo bet memestra, ha gras d’ar re-hont e c’hallomp bremañ kavout o dastumadoù el levraouegoù. Menegomp, e-touez re all, Alfred Bourgeois (1824-1904) en dastumad Vinet (BnF), Arthur de La Borderie (1827-1901), Henri Arbois de Jubainville (1827-1910), Henri Gaidoz (1842-1932), ar chaloni Jean-Marie Abgrall (1846-1926), François Vallée (1860-1949), Taldir-Jaffrennou (1879-1956), Daniel Bernard (1883-1971), an Itr. Lescoat de Lesquiffiou , an Itr. Lacaze de Kerguvelen peotramant c’hoazh an Itr. de Villiers-Terrage.
Moullerien zo, evel Alexandre Ledan, o deus bodet darn eus o froadurioù e stumm teskadoù.

Met da Joseph Ollivier (1878-1946) eo e tleomp ar pezh-mell Catalogue de la chanson populaire sur feuilles volantes (1942). Hemañ a chom hiziv an deiz c’hoazh un dave hep e bar hag a chomer bamet dirakañ. Savet d’ur c’houlz ma ne oa na luc’heilerez nag urzhiataer ebet, e c’haller en em c’houlenn penaos en deus gallet kas al labour-se da benn !

Diviet eo ar c’hatalog-se bremañ ha ne vez kavet nemet er stalioù levrioù kozh. Evit gwelet ar PDF (23Mo), klikit amañ.

Un dra anat e oa adtapout amañ an niveroù roet gant Joseph Ollivier evit ar c’hanaouennoù bodet gantañ. Rak an daveoù-se eo a vez kavet bremañ e fontoù al levraouegoù.

Katalog Bailloud

Gérard Bailloud, eñ, en deus klasket sevel katalog an embannadurioù e brezhoneg graet e ti-embann Ledan e Montroulez.
Gant e labour enklask en deus gallet klokaat hini Joseph Ollivier ha lakaat ouzhpenn un toullad pezhioù na oant ket bet gwelet gantañ.

Dre ma laboure war an embannadurioù Ledan dre vras en deus dalc’het kont ivez eus oberennoù na oant ket gwerzaouet, ha na oant ket follennoù distag kennebeut rak re a bajennoù a oa enne. Miret eo bet ar re-se memestra en dataeg-mañ abalamour da labour Gérard Bailloud da virout e berzh unvan.

Gallout a raer goulenn ar c’hatalog-se digant SKOL (skol@bzh5.com).

Katalog Malrieu TO (Hengoun dre gomz)

Ar C’hatalog kanaouennoù poblek a hengoun dre gomz e brezhoneg (Patrick Malrieu, 1998) a bled gant kanaouennoù an doniaoueg hengounel, evel m’eo lavaret sklaer en titl.

Met lod eus ar pezhioù a gaver en dataeg-mañ, bet embannet war follennoù distag, a zo deuet da vezañ poblek hag hengounel goude se (pe disklêriet evel-se en dastumadoù orin), se a zo kaoz emaint er C’hatalog Malrieu TO-se. Hemañ a c’hall bezañ gwelet e Dastum, 16 straed ar Yec’hed, 35 000 Roazhon, peotramant el levraouegoù skol-veur.
Hag er c’hontrol kanaouennoù zo, a hengoun dre gomz, a zo bet embannet war follennoù distag.

Fichenn deskrivañ ar c’hanaouennoù o deus an daou berzh-se a gas d’ar memes niverenn er C’hatalog Malrieu TO, gant stumm ur c’hot « PM (Patrick Malrieu) n° ar c’han-Titl ».
Darempred Pajenn Facebook